المغالطات المنطقية - الاحتكام إلي عامة الناس

مغالطة (الاحتكام إلي العامة Ad populum, appeal to people ) 

في المغالطة دي بيحاول المتحدث إنه يستند إلي رأي الأغلبية والعامة سواء عامة الناس. أو عامة المثقفين والمميزين أو الشعارات القومية والدينية والسياسية اللي بينضم تخت رايتها الألوف ..

مش معني إن رأي الأغلبية ماشي مع موقف معين يعني إن الموقف ده صح .. 

مش معني إن عامة الناس ف فترة م الفترات كان شايفين إن الأرض مسطحة يعني فعلا إنها مسطحة . وقد ثبت خطأ الأغلبية فيما بعد .

مغالطة الاحتكام الي العامة ليها ٣ أنواع :

النوع الأول : عربة الفرقة الموسيقية Bandwagon 

هنا بيكون فيه ميل غريزي للفرد إنه يمشي ورا المواقف او الأراء اللي بتتخذها العامة والاغلبية ف مجتمعه ... ويحس إنه مدفوع داخليا للانصياع للموقف ده .. في علم النفس فيه حاجة اسمها تأثير عربة الموسيقي Bandwagon effect وده بيوضح ازاي ان الشخص بيحس بالضغط النفسي للانصياع لرأي الأغلبية ... وفي مجال الدعاية فيه حاجة اسمها Bandwagon technique ودي يعني الادعاء بأن الأغلبية بتمشي ورا رأي أو موقف أو حاجة معينة وبالتالي أنت لازم تمشي ورا رأيهم ..

مثال : أثبتت استطلاعات مركز بصيرة أن ٩٠٪ م المصريين يؤيدون فترة ثانية للرئيس مبارك.

*سنسوداين معجون الأسنان رقم واحد وينصح به كل الأطباء حول العالم .

النوع التاني : التأسِّي بالنخبة

  بمعني إنك تمشي ورا أراء الناس المميزة ف مجتمعك وتستشهد بكثرتهم ف إثبات قضية معينة .. مثلا: أغلب الأحيائيين التطوريين لا دينيين .. فأنا هكون لاديني ..

*أنا باخد كورسات ﻷن العشرة الأوائل ف كلية طب المنصورة بياخدوا كورسات...

*قرار الرئيس الأخير بفرض ضرائب ع الطبقات الفقيرة صحيح 100% ﻷنن المجلس الاستشاري لعلماء مصر أعلن ف تصريح تأييده للقرار ( أنت هتفهم أحسن من علماء مصر !! )

النوع التالت : التلويح بالعلم أو التذرع بالوطنية 

أنا قرأت عبارة عجبتني جدا لواحد اسمه صموئيل جونسون (الوطنية هي أخر ملاجئ الأوغاد ) 

أظن كلنا يوميا بنعيش النوع ده .. 

مثال: مينفعش نكره اليهود لمجرد انهم يهود .. فيطلع واحد ويقول اليهود هم أعداء مصر وعاوزين يقسموا الأمة العربية 

أيوة أنت ممكن تاخد موقف م اسرائيل كحكومة ونظام لكن مينفعش تاخد موقف م كل يهود العالم بسبب ديانتهم ..

خد بالك من نقطة مهمة ... ليس كل ما اتفقا عليه جماعة من الناس يبقي اسمه مغالطة لمجرد ان مجموعة كبيرة اتفقت عليه .. لأ الحالة اللي نقول فيها ان الرأي الذي يعتنقه اغلبية الناس فيه مغالطة هو لما يكون أساس صواب الحجة هو العدد الذي يعتنق الرأي....الصح إن أي حجة او اعتقاد يكون أساس صحتهم نابع من داخلهم ومن مقدمات منطقية خضعت لاستدلال منطقي أفضي إلي نتيجة منطقية .. 

مثال ع أن الرأي الأغلبية ممكن يكون لاظهار الصواب او التدقيق والفحص هو استعراض النظراء كشرط من شروط النشر العلمي peer review .

وشهادة الشهود ف المحطمة او اجماع هيئة المحلفين ع حكم ف القضية او تكرار التجربة كشرط م شروط صحتها علي أيد مجموعة مختلفة من العلماء غير ذي صلة بمجموعة البحث الأصلي . 

....

أي أنه يمكن القول أن اثارة حماسة الجموع واثارة عوطفهم برأي معين لا يعني بالضرورة أن الرأي ده غلط او وقع ف مغالطة منطقية بل إن مثل هذا التصرف يمثل وسيلة او عامل خطر Risk factor للوقوع ف مغالطة الاحتكام الي العامة ..

أتمني أكون عرفت أوصل المعلومة دي كويس ..