1الابتسامة - Duchenne smile

هو الواد ده بيبتسم بجد وللا بيعمل نفسه بيبتسم علشان يحسسك إنه مشتاقلك ومتفاجئ بوجودك والفرصة السعيدة اللي جمعتكم ؟ هو المضيفة بتاعت الطيارة فعلا معجبة بيك وبتبسم ليك وللا هي كده مع كله ؟

كان فيه عالم تشريح فرنسي كبير ومشهور بإسهاماته الكبيرة وخصوصا تجاربه الكهربية اللي كان بيجريها ع العضلات وخصوصا لدراسة العضلات المسؤلة عن تعبيرات الوجه . الراجل ده اسمه "Guillaume Duchenne" وفيه ابتسامة متسمية باسمه "Duchenne smile"... ودي حكايتها حكاية !!

 أخصائيين كتير ف الطب النفسي بيعتبروا الابتسامة دي هي المعبر الأساسي والدليل الوحيد علي المتعة والفرحة الحقيقية اللي هي أنت مش بتزيفها قدام صاحبك الرغاي. الابتسامة دي مسؤول عنها عضلتين هما : الـ zygomatic major  أو العضلة الوجنية الكبري (ودي بترفع جانب الفم ) .. والعضلة التانية هي Orbicularis oculi أو العضلة الدويرية العينية ( ودي مسؤولة عن قفل العين ) . اللحظة اللي بيحصل فيه الانفعال المرتبط بالابتسامة دي قصيرة بيتراوح من تلتين الثانية إلي أربع ثواني وغالبا الشخص اللي بيشهد الابتسامة دي بيستجيب من خلال الابتسام .

 فيه عضلات تانية ممكن تعمل تعبير الابتسامة ع الوش .. لكن العضلتين دول هم اللي بيودوا الدوشين سمايل من خلال نشاطهم المتزامن وكأنهم راقصين التانجو في لحظات الفرح الحقيقية.

 العالم دوشين كتب إن احنا ممكن نجبر العضلة الوجنية إنها تنقبض ونمثل الابتسامة لكن نقدر نفرق ابتسامة دوشين الحقيقية عن ابتسامة دوشين المزيفة إن الأولي بيكون معاها انقباض في العضلة الدويرية العينية (صورة أوباما .. وصورة البنت  ) 

هنتكلم عن كذا عنوان رئيسيين :

1- معبرة عن الاستمتاع الحقيقي:

كان فيه واحد اسمه كارني لانديس عمل دراسة سنة 19244(مشكوك ف صحتها بمعايير الأيام دي ) وفي الدراسة دي درس التعبيرات الوجهية Facial Expressions للانسان .. العالم ده أخد صور لوشوش الناس المشاركين للدراسة بعد ما خلاهم يشتركوا في أنشطة مختلفة منها الإيجابي ومنها السلبي :يسمعوا الجاز يقرأوا الكتاب المقدس يتفرجوا علي بورنو أو يقطعوا راس فئران.وبعدين راح محلل الصور دي وتوصل إنه مفيش أي رابط بين الابتسامات وبين المشاعر>>> بمعني أخر .. بيقول إن مفيش دليل إن الابتسامة اللي نوعها (كذا وكذا) معبرة عن مشاعر معينة زي الشعور بالرضا ...وإن (الابتسامات) حاجة يونيفرسال بتحصل ف كل الأوقات والظروف بدون تمييز .

بعدها بعقود العلماء استقروا علي إن الابتسامات بتعبر عن طيف واسع من المشاعر وليست مجرد تعبير  أو اشارة يونيفرسال عن السعادة . ف عام 19700 طلع علينا أخصائيين طب نفسي كبار هم( بول إكمان) و (والاس فريزين) من جامعة كاليفورنيا وتمكنوا إنهم يرصدوا التوافقات العضلية وهي بتشتغل علشان تعمل حوالي 3000 تعبير وجهي بدقة ... والمنظومة دي اسمها FACS (Facial Action Coding System) >> بمعني تاني عملوا سيستم لأرشفة التعبيرات الوجهية...ودي ليها دور كبير هنشوفه قدام . الاتنين دول استخدموا النظام بتاعهم علشان يشوفوا ابتسامة دوشين.

 بعدها اتعمل بحث تاني مع واحد اسمه (ريتشارد دافيدسون) من جامعة ويسكونسين بالمشاركة مع (إكمان) و(فريزين) وأكدوا علي وجود ترابط بين المشاعر الإيجابية وابتسامة دوشين الحقيقية. العلماء دول وصلوا إلكترودز (سلوك / مجسات) لوشوش المشاركين ف الدراسة وفرجوهم علي مقاطع قصيرة مصممة علشان تولد مشاعر ايجابية أو سلبية حسب الحاجة منهم اتنين معمولين للمشاعر الايجابية وفيها حيوانات بتلعب واتنين للمشاعر السلبية وفيهم ممرضة بتتعامل مع حالات بتر الساق وحروق شديدة .

 وبتحليل الداتا .. وجدوا إن ابتسامة دوشين مرتبطة بالمحفزات الايجابية ومش كده بس .. ده كمان علي المستوي العصبي فابتسامة دوشين مرتبطة بنشاط في منطقة في الدماغ مرتبطة بشدة بالتأثير الايجابي [left anterior temporal region المنطقة الأمامية من الفص الصدغي الأيسر] .. وكمان نشاط ف [ left parietal region المنطقة الجدارية اليسارية ] ودي منطقة أصلا بتتحفز بالنشاط الشفوي ( الكلام) .

 والتلاتة أجمعوا علي إن العلماء كانوا مخطئين لما جمعوا كل الابتسامات ف تصنيف واحد معبر عن السلوك وقالوا إنه م الواضح إن ابتسامة دوشين ذات دلالة إيجابية عن الاستمتاع أكثر من الأنواع الأخري من الابتسامات.

 دلائل إضافية ظهرت ....منها مثلا إنهم لاحظوا إن لما مريض الاكتئاب ييجي يخرج من المستشفي بيظهر عليه ابتسامة دوشين بشكل أوضح وأكتر مما كان عليه أثناء دخوله المستشفي .. كمان  ابتسامة دوشين ( مش أي ابتسامة من نوع تاني) كانت بتزيد بشكل تدريجي أثناء الكورس العلاجي النفسي .

 بعض الباحثين الأن بيعتقدوا إن الابتسامات الحقيقية مش المزيفة مش بس مجرد شرارة لحظية كاستجابة لموقف معين .. ﻷ ده كمان تعتبر نافذة بتبص منها علي الحالة المزاجية والعامة للشخص إللي قدامك . إزاي؟ ... أنا هقولك إزاي .. كان فيه واحدة اسمها (ليان هاركر LeeAnne Harker )وواحد اسمه ( داشر كيلتنر ) استخدموا النظام اللي قلنا عليه FACSعلشان يحللوا صور الكتاب السنوي للنساء في إحدي الكليات وبعدين عملت مطابقة لتحليل الابتسامات ودرجاتها مع البيانات الشخصية اللي تم جمعها علي مدار 30 سنة.. واتضح بقي ياسيدي إن الإناث إللي أظهرو ابتسامة دوشين حقيقية وهم عندهم 21 سنة عندهم درجة عالية جدا من الحالة الصحية العامةوالرضا وهم ف سن 52 سنة.. كيلتنر وهاركر بيعلقوا وبيقولوا إن الناس بتصور نفسها بدل المرة اتنين وتلاتة وأكتر من مرة بكل سهولة وهم مش عارفين إن الصور دي بتشيل جواها تعبيراتهم وإنها ممكن تقولنا حاجات كتير عن مستقبلهم .

 دراسة تانية أحدث اتعملت علشان تدرس عوائد (نتايج) الايموشنز علي الجانب البيولوجي اللي هو : مدة الحياة .. الباحثين كروجر و أبيل حللوا ابتسامات لاعيبة البيسبول المحترفين ف الكتاب السنوي لعام 1952 زبعدين حددوا السن إللي توفي عنده كل لاعب ( كان فاضل حولي 46 لاعب ف وقت الدراسة ) .. وجد الباحثين إن شدة الابتسامة وقوتها ممكن تفسير 35 % من التنوع ف معدل البقاء علي قيد الحياة .. ده كمان اللعيبة إللي ظهرت علي وشوشهم ابتسامة دوشين بيبقي عندهم احتمالية أقل بمقدار النصف من احتمالية اللعيبة اللي مظهرش عليهم الابتسامة دي .

 نكمل المرة الجاية باقي العناوين الرئيسية .

الصور فيها : صورة لمضيفة طيران مبتسمة .. الابتسامة دي اسمها : Pan Am smile ودي ابتسامة مزيفة لاظهار الأدب ..فيها اللي بينقبض بس هي العضلة الوجنية من غير العضلة الدائرية العينية .. الاسم جاي من اسم شركة خطوط الطيران Pan American World Airways ..